Beruetetik abiatuta, ez da kexatzeko astirik izango, Akelarre ibilbidea igoera ez oso luzearekin baina %25etik gorako arrapala gogorrekin hasten baitugu. Kaateko Lepoara iristean, eskuinera doan pista hartuko dugu igoera gogorra gainditzen jarraitzeko Iratxoko sarrerara iritsi arte. Flow jaitsiera, pagaditik gehienbat, kurba askorekin, jauzi natural batzuk… eta gaztainondoen arteko bukaera bihurriagoarekin. Difertsio hutsa.

Hormigoizko pistaz Arrarats herria lotuko dugu, urez hornitzeko aukerarekin. Hemendik, arrapala gogorrak Otxolako zelaietara, Otxola ibaia jaiotzen den paraje ederrera. Harrizko txabola txikian ura ere izango dugu.

Bertatik, Ernaitzu mendira igoera ederra Aiskueta bidexka erabiliz, harrien arteko zati ikusgarria, jentilak zeuden mendi-hegal bat zeharkatuz. Bidexkak gora eta gora jarraitzen du Sobresateko hesira iritsi arte. Hemendik aurrera Ernaitzu mendiaren ipar isurialdetik gora jarraituko dugu, “Z” batzuk inprobisatuz aldapa gogorra saihesteko.

Ernaitzuko bidexka goitik hasten da, 360º-ko bista ikusgarriekin. Ezkerrera eginez jaitsiera hasiko dugu, hasiera tekniko batekin zelaia zeharkatzen duen bidexkara iritsi arte. Bidexka hau amaierara iritsi gabe utziko dugu, zelaia zeharkatu eta beste bide batekin lotzeko. Hesia zeharkatu eta jaitsieraren zati dibertigarria hartuko dugu…kurbak, jauzi natural batzuk…oso azkarra.

Jaitsierak Kaateko Lepoan uzten gaitu berriro. Hemendik lehen igoera berriro igoko dugu, baina oraingoan gailurrera, Akerbeltz jaitsiera hartzeko. Jaitsiera zaila, urrats teknikoekin, beherantz goazen heinean leuntzen dena… baina ezingo gara erlaxatu hala ere. Ibilbidea amaitu ondoren, abiapuntura itzultzea baino ez da geratzen.